2 MIN READ

खरे सांगायचे झाले तर स्वतःच्या जोडीदारासोबत इतकी वर्षे राहणे हीच एक सुखद गोष्ट आहे. आपल्या जीवनातील मुख्य जबाबदाऱ्या निभावल्यावर, मुले स्थिर स्थावर झाल्यावरच तर जोडीदाराबरोबर निवांतपणा अनुभवण्याची संधी मिळते. नोकरीतून निवृत्त झाल्यानंतर आयुष्यात पोकळी निर्माण होते असा बऱ्याच लोकांचा समज आहे. परंतु डोळसपणे विचार करता आयुष्य आपल्या मनाप्रमाणे जगण्याची ही संधी असते. इतकेच नव्हे, आपल्या जोडीदाराबरोबर मिळून काही गोष्टी केल्यास हा एकत्र घालवलेला वेळ आनंद देऊ शकेल.

चला पाहूया अशा काही गोष्टी ज्या तुम्ही जोडीदारासोबत मिळून केल्यास मिळेल निखळ आनंद:

1. योग: योग ही भारताने विश्वाला दिलेली फार मोठी भेट आहे. जर आपण रोजच्या जीवनात योगासने केली तर आरोग्याला पूरक असा बदल आपल्या जीवनात घडेल. योगासनांमुळे मन एकाग्र होते तसेच सर्व स्नायू मोकळे होतात. जोडीदाराबरोबर योगासने करणे हा नक्कीच एक आनंददायी अनुभव ठरू शकेल.

2. प्रवास: फिरायला जाणे कोणाला आवडत नाही? ज्या जागा या आधी आपण फक्त फोटोत पाहिलेल्या असतात तिथे जाण्याची संधी कोण सोडेल? इतकी वर्षे फक्त कुटुंबाच्या समस्यांना तोंड देण्यातच गेलेली असतात आणि त्यानंतर जोडीदाराबरोबर हे निवांतलेपण अनुभवण्याची संधी मिळते. छोट्या-छोट्या प्रवासांची योजना आखली तर जीवन किती रोमांचक बनेल! पण लक्षात ठेवा, प्रवासादरम्यान अतिउत्साहात तुम्हाला न झेपणाऱ्या गोष्टी करू नका नाहीतर परत आल्यावर आजारपण येऊ शकेल. ज्यातून बरे होण्यास वेळ लागेल.

 आवर्जून वाचा: How to Prevent Depression in Elderly

3. स्वयं सेवा: अशा खूप साऱ्या एनजीओज आहेत जिथे तुमच्या मदतीची नितांत गरज आहे. मुक्या जनावरांपासून ते निराधार वृद्धांपर्यंत सर्वांना आर्थिक मदतीव्यतिरिक्त अन्य प्रकारच्या मदतीची सुद्धा गरज भासते. अशा संस्थेत स्वयंसेवकांची गरज असते. तुम्ही अशा ठिकाणी जोडीदारासोबत जाऊन मदत करू शकता. दुसऱ्याला आनंद देण्यात जो आनंद असतो, त्याची तुलना कशाशीच होऊ शकत नाही.

4. स्वयंपाक करणे: चांगले जेवण कोणाला आवडणार नाही? तुम्ही जेव्हा तरुण होता, तेव्हा मुलांसाठी गडबडीत स्वयंपाक करून आणि त्यांचे डबे भरून शाळेत सोडण्याचे काम करत होता. यानंतर त्याच वेगाने तयार होऊन ऑफिसला जायची गडबड. त्यात दोन घास सवडीने खायला वेळ कुठे होता? पण आता ते दिवस सरले. आता जोडीने स्वयंपाक करा. नवीन नवीन पाककृती निवडा आणि चवीचवीने खा.

5. बागकाम: स्वतःच्या हातांनी लावलेली फुलझाडे, भाज्यांची रोपे मोठी होताना, फुलताना पाहणे हा एक आगळाच अनुभव असतो. जोडीदाराबरोबर मिळून त्यांना पाणी घालणे, वाढवणे ही कामे केल्यामुळे बागेशी आणि जोडीदाराशी तुमचे नाते अधिक घट्ट होईल.

6. खेळांची रात्र: रात्रभर मित्रांसोबत कॅरम, पत्ते खेळण्याचे दिवस तुम्हाला आठवतात का? आताही दैनंदिन व्यवहारांमध्ये वेगळेपण आणण्यासाठी वेगवेगळे खेळ तुम्ही खेळू शकता. तुमच्या जोडीदाराबरोबर आणि आजुबाजूच्या मित्रमंडळींना घरी बोलावून अशा खेळांच्या रात्रीचे नियोजन तुम्ही करू शकता. एक रात्र जागल्यावर दुसऱ्या दिवशीची कामे आरामात उशीरा उठून करा जेणेकरून थकवा येणार नाही.

7. नवी भाषा शिका: नवीन भाषा शिकणे हा तुमच्या मेंदूला ताजेतवाने आणि कार्यरत ठेवण्याचा एक उत्तम मार्ग आहे. सहज उपलब्ध असणाऱ्या  भाषांच्या वर्गात तुम्ही प्रवेश घेऊ शकता. जोडीदाराबरोबर तुम्ही स्पर्धा करू शकता आणि एकमेकांचे मार्गदर्शनही करू शकता. जे तुम्हाला कॉलेजमध्ये किंवा शाळेत करता आले नाही ते तुम्ही या वयात सहज करू शकता. आणि महत्त्वाची गोष्ट म्हणजे तुमच्यावर उत्तीर्ण होण्याचे बंधनही नाही.

यांपैकी कोणतीही गोष्ट जोडीदाराच्या साथीने करा आणि आयुष्याचा आनंद घ्या.

हे आवर्जून वाचा: What Loneliness can do to Older Adults

Ask a question regarding उतारवयातील सुखी आणि व्यस्त दांपत्यजीवनासाठी ७ कार्ये

An account for you will be created and a confirmation link will be sent to you with the password.

LEAVE A REPLY

Please enter your comment!
Please enter your name here